Աշխատանքի թույլտվություն
Արդյո՞ք օտարերկրացիները պետք է ունենան աշխատանքի թույլտվություն Հայաստանում աշխատելու համար
Այո՛: Հայաստանում օտարերկրացիներին աշխատանքի ընդունելու համար պահանջվում է աշխատանքի թույլտվություն: Ընդ որում, Հայաստանում գոյություն չունեն օտարերկրյացի աշխատողների քանակային սահմանափակումներ:
Ովքե՞ր կարող են աշխատել առանց աշխատանքի թույլտվության
Առանց աշխատանքի թույլտվության Հայաստանի Հանրապետությունում կարող են աշխատել`
-
Հայաստանի Հանրապետության մշտական և հատուկ կացության կարգավիճակ ունեցողները,
-
ժամանակավոր կացության կարգավիճակ ունեցող անձինք և ովքեր միաժամանակ ունեն ընտանիքի անդամ, ով Հայաստանի քաղաքացի է կամ ունի մշտական, հատուկ կամ ժամանակավոր կացության կարգավիճակ,
-
ապաստան ստացած անձինք,
-
օտարերկրյա դիվանագիտները և նրանց ընտանիքի անդամները,
-
մերձսահմանային շրջանների աշխատողները,
-
կարճ ժամկետով ժամանած մշակութային գործիչները և մարզիկները,
-
օտարերկրյա կապիտալի մասնակցությամբ առևտրային կազմակերպությունների հիմնադիրները, տնօրենները կամ լիազորված ներկայացուցիչները,
-
օտարերկրյա առևտրային կազմակերպությունների աշխատակիցները,
-
մեքենաներ, սարքավորումներ, հաստոցներ տեղադրելու և վերանորոգելու նպատակով ժամանող մասնագետները (մինչև 6 ամիս ժամկետով),
-
օտարերկրյա լրագրողները,
-
հրավիրված դասախոսները,
-
արձակուրդների ժամանակ փոխանակումների շրջանակներում ժամանած ուսանողները,
-
բարձր որակավորում ունեցող աշխատողները (մասնագետների ցանկը սահմանվում է ՀՀ կառավարության որոշմամբ),
-
ՀՀ միջազգային պայմանագրերի հիման վրա աշխատանքի թույլտվության պահանջից ազատված անձինք։
Ո՞վ է պարտավոր դիմել աշխատանքի թույլտվություն ստանալու համար
Աշխատանքի թույլտվություն ստանալու համար դիմումը ներկայացնում է գործատուն:
Ո՞ր պետական մարմինն է տալիս աշխատանքի թույլտվություն
Աշխատանքի թույլտվություն տրամադրում է աշխատանքի և սոցիալական հարցերի նախարարությունը (հասցե՝ ք. Երևան, Հանրապետության հրպ. Կառավարական տուն 3):
Ե՞րբ կարող է գործատուն դիմել աշխատանքի թույլտվության համար
Մինչև աշխատանքի թույլտվություն ստանալու համար դիմում ներկայացնելը, գործատուն պետք է տեղեկացնի աշխատանքի և սոցիալական հարցերի նախարարությանը թափուր հաստիքի մասին: Դրանից հետո, նախարարությունը ստուգում է զբաղվածության ոլորտի տեղեկատվական շտեմարանը և պարզում, թե արդյո՞ք առկա են թափուր աշխատատեղին համապատասխանող աշխատանք փնտրող ՀՀ քաղաքացիներ: Նման անձի (անձանց) առկայության վերաբերյալ վերջիններս ուղեգրվում են տվյալ գործատուի մոտ, ով կարող է վերջիններիս ընդունել կամ չընդունել աշխատանքի:
Գործատուն աշխատանքի թույտվության համար դիմում է, եթե
-
թափուր հաստիքի մասին նախարարությանը տեղեկացնելուց հետո նախարարությունը գործատուին չի ներկայացնում Հայաստանի քաղաքացիություն ունեցող անձ, կամ
-
գործատուն որոշում է այդ անձին չվերցնել աշխատանքի:
Ի՞նչ փաստաթղթեր են անհրաժեշտ աշխատանքի թույլտվություն ստանալու համար
-
դիմում` օտարերկրացու համար աշխատանքի թույլտվություն տրամադրելու մասին` համաձայն ձևի.
-
օտարերկրացու անձնագրի էլեկտրոնային պատկերատպված (սքանավորված) տարբերակը, ընդ որում` անձնագրի վավերականության ժամկետն առնվազն վեց ամսով պետք է գերազանցի աշխատանքի թույլտվության ժամկետը.
-
օտարերկրացու ստացած մասնագիտական կրթության, որակավորման մասին փաստաթղթերը` հյուպատոսական վավերացմամբ կամ ապոստիլով հաստատված (եթե թափուր աշխատատեղը համալրելու համար պահանջվում է մասնագիտական կրթություն, որակավորում) կամ oտարերկրյա պետություններում ստացած գիտական աստիճանի վկայագիրը` Հայաստանի Հանրապետության կրթության, գիտության, մշակույթի և սպորտի նախարարության բարձրագույն որակավորման կոմիտեի կողմից համապատասխանեցված Հայաստանի Հանրապետության գիտական աստիճանի վկայագրին.
-
օտարերկրացու 3x4 չափի մեկ գունավոր լուսանկար.
-
պետական տուրքի վճարման անդորրագիրը (25 000 ՀՀ դրամ):
Որքա՞ն ժամանակ է գործընթացը տևում
Որոշումը կայացվում է պահանջվող բոլոր փաստաթղթերը ներկայացնելուց հետո՝ 5 աշխատանքային օրվա ընթացքում:
Ո՞ր դեպքերում կարող է մերժվել աշխատանքի թույլտվություն ստանալու վերաբերյալ դիմումը
Աշխատանքի թույլտվություն տրամադրելը մերժվում է, եթե`
-
Հայաստանի Հանրապետության աշխատաշուկայի վիճակը վերջինիս վերլուծության հիման վրա թույլ չի տալիս այդ աշխատանքը.
-
տվյալ աշխատանքը կատարելու համար Հայաստանի Հանրապետության օրենքներով պահանջվում է Հայաստանի Հանրապետության քաղաքացիություն.
-
պահանջվող տեղեկատվությունը կամ փաստաթղթերը կեղծված են.
-
գործատուն, որի մոտ պետք է աշխատի տվյալ օտարերկրացին, նախկինում խախտել է օտարերկրացիներին աշխատանքի ընդունելու պահանջները.
-
գոյություն ունեն Հայաստանի Հանրապետության պետական անվտանգությանն սպառնացող պատճառներ:
Մերժումը կարող է բողոքարկվել դատական կարգով:
Ի՞նչ պատասխանատվություն է նախատեսված օտարերկրացուն առանց աշխատանքի թույլտվության աշխատանքի ընդունելու համար
Օրենքի խախտմամբ՝ առանց աշխատանքի թույլտվության օտարերկրացու աշխատանքի ընդունելու համար սահմանված է տուգանք 100-150 000 ՀՀ դրամի չափով:
Բացի այդ, առանց աշխատանքի թույլտվության աշխատելը հիմք է հանդիսանում օտարերկրացուն տրված մուտքի վիզան ուժը կորցրած ճանաչելու համար:
Ի՞նչ է լինում, եթե աշխատանքի թույլտվություն ստանալուց հետո գործատուն օտարերկրացուն չի ընդունում աշխատանքի
Եթե գործատուն աշխատանքի թույլտվություն ստանալուց հետո մեկ ամսվա ընթացքում օտարերկրացու հետ չի կնքում աշխատանքային պայմանագիր, ապա աշխատանքի թույլտվությունը ուժը կորցրած է ճանաչվում:
Բացի այդ, նման դեպքում գործատուն հոգում է օտարերկրացու, ինչպես նաև նրա ընտանիքի անդամների, որոնց թույլատրվել է ուղեկցել կամ միանալ նրան, հետևյալ ծախսերը` նշված չափերով, յուրաքանչյուր անձի համար`
-
ապրուստի ծախսը` նվազագույն ամսական աշխատավարձի (որը 01.01.2020թ. դրությամբ կազմում է 68 000 ՀՀ դրամ) կրկնապատիկի չափով՝ ամսական կտրվածքով, երկու ամիս ժամկետով.
-
անձնական ունեցվածքի փոխադրման ծախսերը` նվազագույն ամսական աշխատավարձի քառապատիկի չափով` միանվագ.
-
վերադարձի ծախսերն իրենց ծագման պետություն կամ այն պետություն, որտեղից ժամանել են` օտարերկրացու կողմից ընտրված տրանսպորտային միջոցով և տվյալ պահին հնարավոր նվազագույն գներով:
ՀՀ կառավարության 12.05.2016թ. թիվ 493-Ն որոշմանը ծանութանալու համար հետևեք այս հղումին:
Տեղեկացում
Այս հոդվածները կարդալը և դրանց համաձայն գործելը չի ստեղծում փաստաբան-հաճախորդ հարաբերություններ: Պարզության համար այս վեբկայքի հոդվածները բաց են թողնում որոշ ավելի քիչ տարածված իրավիճակների վերաբերյալ կանոններ և չեն կարող արտահայտել խիստ ճշգրիտ իրավական ձևակերպումներ: Այստեղ տեղեկատվությունը հիմնված է իրավական դրույթների՝ մեր ընկալման և մեկնաբանության վրա, և որոշ դեպքերում կարող է չարտացոլել օրենսդրության և պրակտիկայի վերջին փոփոխությունները: Լրացուցիչ տեղեկությունների համար կարող եք կապնվել մեզ հետ։
Առցանց խորհրդատվություն
Դուք կարող եք ստանալ առցանց խորհրդատվություն համապատասխան ոլորտի մասնագետի կողմից